[COSMOGIRL]精叻用信用咭慳錢妙法！（上）（下）

精叻用信用咭慳錢妙法！（上）

之前要結婚擺酒而申請了超過六張信用咭！
粗略估計，我因此慳咗唔少錢：

我獲得了超市現金券，以及信用咭簽帳回贈各超過1,000蚊，仲有一堆禮物：
好似係Sanrio碗碟一套、湯券20張（每張價值40幾蚊架！）、則卷小雲鐘，以及飲品券兩張等等。

唔好誤會，我唔係叫你係咁申請信用咭，不過，如果你明知自己將會有大額消費，
好似聖誕節瘋狂購物、結婚，又或者係搬屋買傢俱呢啲，
真係不妨申請多幾張！不過大前提係：

1. 必定要記得準時交咭數，亦要清楚記錄自己幾時申請，方便之後cut咭，
因為每張咭都有規定成功申請後幾耐先可以cut咭的啊！

2. 如果你好大頭蝦，又或者怕麻煩，就諗清楚先好申請！
就算真係申請，都一張起兩張止好了！切忌因小失大！

3. 使用信用咭，係要用得精明先可以慳到錢！

精叻用信用咭慳錢妙法！（下）

上次講到，使用信用咭，必定要用得精明先可以慳到錢！就等我同你分享我嘅心得

1. 如果走入銀行申請，一般獲得的禮物都會比較少，如果你有心申請某張信用咭，
不妨check check邊度有promotion，而送贈的禮物跟在銀行申請有甚麼不同！

2. 信用咭禮物有幾種，你可以揀一些最多禮物同優惠的申請，好似有啲簽滿一個數就會有幾百蚊簽帳回贈！
（我試過最抵的是簽滿二百蚊，就有三百蚊簽帳回贈！）
而某些信用卡更有即場禮物及齊文件禮物，只要你帶齊文件（身份證、糧單及住址證明）去申請，未簽帳已經有禮物！
不過你申請前要先知道嗰張咭有咩送，我試過個staff無俾齊文件禮物我，要問先有！

3. 每次詢問有關信用咭的事宜，無論你在銀行問抑或打電話到咭中心，
都要記低職員的姓名及職員編號，點解？
因為我試過無數次職員之間講嘅嘢有出入，你有佢哋嘅資料喺手，就唔使「死無對證」！

4. 銀行會不定期有一些信用咭額外簽賬獎賞計劃，要注意這些計劃一般都需要登記，
而且是指定時段的，有些更要購買指定產品或到指定商舖簽帳先得，買之前記住問清楚兼睇清楚啲條款！
例如佢話食肆，到底係所有食肆定指定食肆？
又例如佢話購買電器先有，到底銀行指的電器即是甚麼產品？例如iPhone算唔算。

5. 無論係額外簽賬獎賞計劃抑或一般的簽賬回贈，都可能有回贈上限，
即係你無論簽幾多錢，最多都係得某個數的回贈！

6. 而家好興一啲「先拎禮物後簽帳」的計劃，即係佢先俾禮物你，例如係湯券，
但你拎咗之後要喺某段時間內簽滿一個數，簽少一蚊都要俾返湯券嘅面值俾銀行，
所以如果你參加呢種計劃，真係要確保自己有嘢要買先好！

CG! Tips：
記住！用信用咭係因為錢反正都要使，如果用咗可以慳錢就梗係用啦！
但如果你會因為咁而使多咗錢又或俾人罰錢，咁你都係老實啲用現金好了！

Source: 

1. 精叻用信用咭慳錢妙法！（上）
   http://www.cosmogirl.com.hk/inner-girl/inner-girl-insight/credit-card-save-money
2. 精叻用信用咭慳錢妙法！（下）
   http://www.cosmogirl.com.hk/inner-girl/inner-girl-insight/smart-credit-card-save-money